Кыргыз жергесинде 200 миң адам жумушу жок отурат

Кыргыз жергесинде 200 миңден ашык адам жумушу жок отурат. Бул тууралуу бүгүн, 9-июлда маалымат жыйынынын жүрүшүндө КРнын Улуттук статистика комитетинин эмгек жана иш менен камсыз кылуу статистикасы бөлүмүнүн башчысы Гүлнара Жайлообаева билдирди. Анын айтымында, бүгүнкү күндө 2,5 миллион адам ишке жарактуу болуп саналат. Бирок алардын 2,3 миллиону гана жумуш менен камсыздалган.

“Баткен облусунда экономикалык активдүү калктын 12,6 пайызы гана иштейт. Ал эми жумуш менен эң жакшы камсыздалган облус - Талас аймагы, анда калктын 73,2 пайызы эмгектенет. Өлкөдө жумуш менен камсыздалгандардын саны боюнча эң жогорку көрсөткүчтү курагы 30-49 жаштагы жарандар түзөт. Муну менен катар айта кетсек, республикада жаштардын үчтөн бир бөлүгү гана жумуш менен камсыз болгон”,-дейт Жайлообаева.