Ошто мектеп окуучусу 2 жашар тууганын атып алып, бала каза тапты

Ош облусунун Кара-Кулжа районунда 10 жаштагы мектеп окуучусу 2 жашар баланы атып алды. Бул тууралуу бүгүн, 9-июлда SUPER.KG порталына Ички иштер министрлигинин Ош облусу боюнча башкы башкармалыгынын басма сөз кызматынын жетекчиси Жеңиш Ашырбаев билдирди.

Анын айтымында, окуя 6-июль күнү саат 06:00 чамасында Сары-Кыр жайлоосунда орун алган. Анда 2005-жылкы У.К. аттуу бала Р.Б. аттуу 2013-жылы төрөлгөн тууганы менен ойноп жатып үйдө турган ИЖ-16 мергенчилик мылтыгы менен кокустан атып алган. 2 жаштагы бала ошол жерден каза тапкан.

“Кырсык тууралуу укук коргоо органдарына 8-июль күнү гана кабарланган. Окуя болгон учурда балдардын ата-энеси мал карап жүрүшкөн. Учурда текшерүү иштери жүрүүдө. Мындан тышкары мергенчилик мылтык каттоодо турбагандыгы аныкталды. Атып алган баланын атасынын айтымында, ок атуучу курал анын атасынан калган. Алар мылтыкты ар кандай жырткычтардан коргонуу үчүн жайлоого алып барышканын билдиришти”,- деди Ашырбаев.