Чычкан суусуна Нива үлгүсүндөгү унаа 20-30 метр бийиктиктен түшүп кетип, 2 адам көз жумду

10-июль күнү саат 20:02де Бишкек-Ош унаа жолунун 266-чакырымында Нива үлгүсүндөгү унаанын айдоочусу унааны башкара албай унаа Чычкан суусуна 20-30 метр бийиктиктен кулап түшкөн. Жол кырсыгынан 2 адам каза болгонун 13-июлда Өзгөчө кырдаалдар министрлигинин маалымат кызматы билдирди. 

Ал күнү окуя болгон жерге ӨКМнын №97-өзгөчө кырдаалдар бөлүмүнүн куткаруучулары барышып, унааны жана каза болгондорду суудан чыгара алышкан эмес. 11-июлда саат 11:30да унааны чыгарышкан, бирок ичиндеги адамдар сууга агып кетишкен. №97-өзгөчө кырдаалдар бөлүмүнүн 15 куткаруучусу издөө жүргүзүп, саат 13:20 чамасында 2000-жылы туулган Мунара Бекибаева аттуу жарандын жансыз денесин кырсык болгон жерден 100 метр төмөн тараптан таап, туугандарына өткөрүп беришти. Ал эми экинчиси Тургенко Станислав Владимировичти издөө иштери жүргүзүлүп, натыйжа болгон жок.