Жаңы конуштун тургуну: “Бишкек менен анын конуштарынын ортосундагы жашоо айырмачылыгын жоюу керек”

“Бишкек менен анын конуштарынын ортосундагы жашоо айырмачылыгын жоюу керек”,- дейт бүгүн, 14-июлда маалымат жыйындын жүрүшүндө Алтын-Казык конушунун тургуну Замирбек Абдылдаев. Анын айтымында, конуштарда тургундардын каттоосу жок болгондуктан, жумушка орношо албай же медициналык жардам ала албай жүрүшөт.

“1989-жылдан бери Бишкектин тегерегинде 47 жаңы конуш пайда болгон. Аларда жалпысынан 500 миң адам күн кечирип келет. Бизде социалдык чечилбеген маселе көп, мисалы, план боюнча 63 бала бакча курулат делген. Бүгүнкү күндө алардын алтысы гана салынды. Мындан тышкары 300 чакырым жолго асфальт төшөлөт делген, учурда 30 чакырымдын гана тегерегиндеги жол салынды. Эң башкысы, тиешелүү документи жок болгондугуна байланыштуу 50 миң кыргыз жараны шайлоого катыша албай калат. Бизде кедейчилик өкүм сүрүп келет. Газ, суу деген нерсе жок. Конуштардын жашоочулары деле өлкөбүздүн жарандары, аларга эмнеге мындай мамиле жасалары түшүнүксүз”,- деди тургун.