Өмүрбек Текебаев: "Ниетибизди оңдомоюнча жакшы заман орното албай турганыбызды түшүндүк"

"Ата Мекен" социалисттик партиясы быйылкы жылдын жазынан баштаган партиялык конференцияларын өткөрүп, эми аяктоо алдында турат. Кыраакы лидер Өмүрбек Текебаев эл аралап, алардын көйгөйүн изилдеп, эл арасынан болочокто партияны жетектеп кете ала турган, бычакка сап болчу азаматтарды караштырып, партиянын, коомдук-саясий турмуштун көйгөйлөрүн кадырман калк менен биргеликте талкуулап келет. 

Буга чейин республиканын бардык райондорунда, Ош шаары баштаган бир топ шаарларда, Нарын жана Талас облустарында партиялык конференцияларды ийгиликтүү өткөрүп келаткан партиянын кезектеги конференциясы Жалал-Абад облусунда уланды. 

Коомдук турмушта, партияда лидердин ээлеген орду, жасаган кадамдары жана айткан сөздөрү абдан чоң мааниге ээ. Бул жагынан "Ата Мекендин" лидери камчы салдырбай алдыда келет жана айткандарынын көбү далилденет же ишке ашат. Жалал-Абадда өткөн облустук конференцияда дагы Өмүрбек Текебаев кыргыз коому үчүн маанилүү бир топ ойлорун ортого салды. 

"Биз жаңы адам жана жаңы коомду курабыз деп убада бергенбиз, анткени биз кеселибизди аныктай билдик. Кеп өзүбүздүн ниетибизде жана жан дүйнөбүздө экен. Ошондуктан социалисттик партия катары рынок экономикасына макулбуз, бирок рыноктук коомго каршыбыз, анткени адам баласында, кыргыздарда сатылбай турган баалуулуктар арбын. Ошондуктан "баарынын сатылышына, коомдун соодаланышына каршыбыз" деп чыктык. Жан дүйнөбүздү, ниетибизди өзгөртмөйүнчө жакшы заман, жаңы кыргыз өлкөсүн кура албай турганыбызды түшүндүк",- деди Текебаев.  

Дүйнөлүк деңгээлдеги китептер: Инжилде, Тоорат менен Куранда да ушулар туурасында айтылат. Акылман кыргыз жөн эле "ниетиңди оңдо" деп койгон. Адам баласынын аң-сезимин, ой жүгүртүүсүн оңдомоюн, өзгөртмөйүн коомду өзгөртүү кыйын деп айтылат заманбап илимдерде. А бирок аны аткаруу кыйын, кол куушуруп отурган да жарабайт. Ө.Текебаев баш болгон "Ата Мекен" партиясы мына ошого шымалана киришип коомду өзгөртүп, өнүгүүнү жаңы нукка бурганга аракет кылууда. Бул идея ишке ашса, мамлекетибиздин жарандарынын жашоо-тиричилиги мурдагыдан бир канча эсеге жакшырарына "Ата Мекендин" лидери терең ишенет. Анткени өзгөрүлгөн аң-сезим жаңыча ой жүгүртөт.