"Депутат Коркмазовдун Түлеевдин акталышына жардам берүү үчүн пара алуусуна мен ортомчу болгон эмесмин" дейт Нарымбаев

"Депутат Хажимурат Коркмазовдун Нариман Түлеевдин акталышына жардам берүү үчүн анын жакындарынан 100 миң доллар пара алуусуна мен ортомчу болгон эмесмин",- дейт президенттик аппараттын башчысы Данияр Нарымбаев. Аппарат башчы бул тууралуу бүгүн, 15-июлда журналисттер менен болгон жолугушуусунда айтты. Ошондой эле Коркмазовдун "Нарымбаевдин бул ишке катыштыгы бар" деп айтканын сот чече турганын белгиледи. "Биринчиден, депутаттын минтип айтканын маалымат каражаттарынан азыр гана окудум. Анткени саат 15:00дөн баштап мен өзүм жетектеген Мамлекеттик сыйлыктар боюнча комиссиянын жыйынында болуп, азыр гана чыктым. Экинчиден, бул ишке аралашкан болсом, укук коргоо органдарынан келип мени суракка алмак, эч ким келген жок. Демек, анын айткандары калп, бирок бул ишти сот гана чечет",- деди ал.

Бүгүн, 15-июлда Жогорку Кеңештин депутаты Хажимурат Коркмазов 100 миң доллар пара алып жаткан жеринен УКМК тарабынан кармалды. Депутат кесиптеши, Бишкектин мурунку мэри Нариман Түлеевдин иши Жогорку Сотто каралганда жардам берем деп экс-мэрдин жакындарынан 200 миң доллар талап кылган. Аталган сумманын жарымын алып жатканда кармалып, учурда сурак берүүдө. Суракта Коркмазов бул ишке Данияр Нарымбаевдин катышы бар экенин билдирди.

Эске салсак, Бишкектин мурдагы мэри Н.Түлеевди эки инстанциядагы сот күнөөлүү деп таап, 11 жылга эркинен ажыраткан. Азыркы тапта кылмыш иши Жогорку Сотто каралууда. Түлеев "2008-жылы мэр болуп турганда Кытайдан автобустарды алып келүү иштеринде мамлекетке ири көлөмдө зыян келтирген” деп айыпталып, 2012-жылдын октябрь айында камакка алынган.