Бишкек шаары Барселонада өтө турган Бүткүл дүйнөлүк Smart City конгрессинде көрсөтүлүшү мүмкүн

Бишкек шаары Испаниянын Барселона шаарында өтө турган Бүткүл дүйнөлүк Smart City конгрессинде көрсөтүлүшү мүмкүн. Бул тууралуу бүгүн, 16-июлда Бишкектин мэри Кубанычбек Кулматов менен Испаниянын Барселона шаарынын вице-мэри Антони Вивес Томастын жолугушуусунда белгилүү болду. Барселонанын вице-мэри Бишкек мэриясын Барселонага келип, Бишкек шаары жөнүндө дүйнө коомчулугуна билдирүү жасоого чакырды.

Айта кетсек, Бүткүл дүйнөлүк Smart City конгресси быйылкы жылдын ноябрь айында өтөт. Эл аралык иш-чарага 200дөн ашык дүйнөнүн шаарларынын өкүлдөрү катышат. Анын жүрүшүндө заманбап техникалардын бет ачарлары өткөрүлүп, өнүккөн шаарлардын башкаруучулары ишинин ыкмалары туурасында айтып беришет. Бишкек шаары үчүн мындай иш-чарага катышуу анын таанылышына жана инвесторлорду кызыктырууга алып келиши мүмкүн экенин айткан Кулматов мындай деди: “Бизге азырынча чакыруу гана келип түштү. Бирок аталган конгресске катышабыз деп толук айта албайм, анткени биз баарын эсептеп, ойлонуп көрүп, анан керектүү делген кадамдарга барабыз”.