2010-жылкы Июнь окуясына күнөөлөнүп издөөдө жүргөн жаран кармалды

2010-жылкы Июнь окуясына тиешеси бар делинип издөөдө жүргөн жаран кармалды. Жалал-Абад ОИИБинин билдиришинче, кармалган жаран 2010-жылдын 13-июнунда Ош-Бишкек жолунда Базар-Коргон айылындагы көпүрөнүн үстүндө 450-500дөй адамга кошулуп ок атуучу куралдар, темир таяк жана бычактар менен куралданып, улуттар аралык жаңжал чыгаруу максатында Базар-Коргондун мал базарынан келе жатышкан эки жаранды токтотушуп, колдоруна бир нече жолу бычак сайып, экинчисинин башына таяк менен чаап кыйнаган.

Окуя учурунда жабырлануучулар кылмышка шектүүнү таанып калышкан.

"Аталган факт боюнча 2011-жылы Базар-Коргон райондук прокуратурасы тарабынан кылмыш иши козголгон.

Базар-Коргон райондук соту 2011-жылдын 15-июнунда Базар-Коргон айылынын 1977-жылы туулган А.Л. аттуу тургунун камакка алуу чечимин чыгарып, издөө жарыяланган. Буга чейин бул жарандын Орусия аймагында жашырынып жүргөнү тууралуу маалыматтар болгон. Иликтөө иштеринин натыйжасында 2015-жылдын 18-июлунда издөөдө жүргөн Базар-Коргон айылынын тургуну А.Л. кармалып, Базар-Коргон РИИБинин убактылуу кармоочу жайына киргизилди",- деп билдирет ОИИБ.