Жаштар "кыргыз маданиятынын баалуулуктары шылдыңга алынды" деп Боом капчыгайындагы граффитини өчүрүүнү көздөшүүдө

Кыргыз жаштары "Боом капчыгайында "- Эээ... Кандай?" деген граффитинин жанында жылаңач аялга жана маймылга окшош балбал таштар тартылган. Бул элдин маданий баалуулуктарын шылдыңдагандык" деп граффитини өчүрүүгө каражат чогултушууда. Интернеттеги социалдык тармактарда талкуу жараткан сүрөттү коргогондор да, жеригендер да бар.

Ал эми аталган граффитинин авторлору өз кезегинде мындай демилгеге таң калып жаткандыктарын билдирип, активисттерди элди туура эмес маалыматка үндөбөөгө чакырышат. Муну блоггер Кайрат Бекмамбетов билдирди.

“Активисттер кайсы балбал ташты жылаңач аялга жана маймылга окшоштурганыбызды айтып жатышканына азыркыга чейин таң калып жатабыз. Сүрөттүн композициясында сүрөтчүлөрдүн терең чыгармачылык мааниси камтылган. Ошондой эле граффитинин жалпы идеясы ак илбирсти коргоону этникалык мотив менен бекемдөө болгон”,- деп билдирет граффитинин авторлору.

Эске салсак, июнь айынын соңунда өткөн Көчө маданияты фестивалынын алкагында Боом капчыгайында "- Эээ... Кандай?" деген граффити тартылган. Учурда граффитини айрымдары шылдыңдоо катары кабыл алса, айрымдары, тескерисинче, заманбап, оригиналдуу көрүнүш катары баалашууда.