Баңгизат менен кармалган Абдували Акжолов 20 жылга чейин эркинен ажыратылышы мүмкүн

“Оор кылмышка шектелип жаткан отставкадагы полковник Абдували Акжолов мыйзам чегинде 8-20 жылга чейин эркинен ажыратылышы мүмкүн”. Муну бүгүн, 21-июлда SUPER.KG порталына Баңгизатты көзөмөлдөө боюнча мамлекеттик кызматтын Тергөө башкармалыгынын башчысы Бактыбек Сүйүнбаев билдирди. Анын айтымында, 16-июлда Улуттук госпиталда жаткан Акжолов дарыгерлердин “дарылануусу толук бүттү” деген чечими менен ооруканадан чыгарылган.

“Кылмышка шектүү Абдували Акжолов Бишкек шаардык сотунун чечими менен №1-СИЗОго 2 айга камакка алынган. Ал Кылмыш жана жаза кодексинин 247-беренеси (баңги каражаттарын, психотроптук заттарды же прекурсорлорду мыйзамсыз даярдоо, сатып алуу, сактоо, ташуу, жөнөтүү) боюнча айыпталууда.

3-4-июлга караган түнү Акжолов 12 килограмм гашиш, кишен, Марголин үлгүсүндөгү тапанчасы 8 огу менен кармалган. Ал суракта Тажикстандын жараны ага 400 доллар берип, унааны жана анын ичиндеги баштыкты бирөөлөргө жеткирип берүүнү айтканын билдирди. Тажик жаранынын унаасын ал Бишкектин Түгөлбай ата - Ибраимов көчөлөрүнүн кесилишиндеги унаа токтоочу жайга койгон да, өзүнүн Ауди үлгүсүндөгү унаасына баңгизаты бар баштыкты салып Жал кичи районуна алып бараткан. Аны кармоого аракет кылганда Акжолов качуу аракетин көргөн. Иликтөө иштери жүрүүдө”,- деди Сүйүнбаев.