Бишкекте парламент депутатынын айдоочусу катышкан жол кырсыгы боюнча кылмыш иши козголду

Бишкекте парламент депутатынын айдоочусу катышкан жол кырсыгы боюнча кылмыш иши козголду. Бул тууралуу бүгүн, 23-июлда Ички иштер министрлигинин басма сөз кызматы билдирди.

Маалыматка караганда, окуя үстүбүздөгү жылдын 3-июлунда болгон. Анда 1975-жылы туулган Аида Орозбаева жумушка бара жатканда Горький жана Алматы көчөлөрүнүн кесилишинде парламент депутатынын айдоочусу Тойота Камри унаасы менен сүзүп алган. Жабырлануучу анын кесепетинен ооруканага жеткирилип, 13-июлда каза болгон.

Учурда “транспорт каражаттарынын кыймылынын жана аларды пайдалануунун коопсуздук эрежелерин бузуу” беренеси боюнча кылмыш иши козголуп, тергөө амалдары жүрүп жатат.

Ал эми маркумдун жакындарынын айтымында, окуя болгон учурда унаада Жогорку Кеңештин депутаты Таалайбек Ибраев жана анын жардамчысы болгон.