Ош облусунун аймагында 2 күндө 30 гектар жердеги кара куурайлар орулуп, жок кылынды

Ош облусунун аймагында 2 күндө 30 гектар жердеги кара куурайлар орулуп, жок кылынды. Бул иш-чара Ош облусунун аймагында “Кара куурай” деген аталыштагы операциянын алкагында болду. Анда Кара-Суу, Кара-Кулжа райондорунун аймагында милиция кызматкерлери жапайы өскөн кара куурайды жок кылуу боюнча иш алып барышууда. Бул тууралуу ИИМдин Ош шаары жана Ош облусу боюнча Башкы башкармалыгынан кабарлашты. 

Маалым болгондой, иш-чарада айыл тургундарына үй алдында өскөн жапайы өсүмдүктү жок кылуу боюнча түшүндүрүү иштери жүрүүдө. Мыйзамда көрсөтүлгөндөй, там алдындагы жерлерге чыккан кара куурайды жок кылуу аракети көрүлбөсө, Кыргыз Республикасынын Административдик кодексинин негизинде жазага кириптер болушу мүмкүн. Ал эми атайылап өстүргөн болсо, КРнын Кылмыш-жаза кодексинин 250-беренесиндеги кылмыш белгилери боюнча кылмыш иши козголот. 

“Кара куурай” операциясынын жүрүшүндө жапайы өсүп чыккан бул уулуу өсүмдүктү оруп, өрттөп жок кылуу колго алынган. Эки күндүн ичинде Ош облусунун аймагында 30 гектардан ашуун жердеги кара куурай өсүмдүгү жок  кылынды. Иш-чара уланууда.