Өмүрбек Текебаев: "Эгерде бүгүнкүдөй жол менен бара берсек, биз кайрадан 2010-жылга чейинки диктатурага жана соттук баш аламандыкка толук келип калышыбыз мүмкүн”

26-июлда Ош улуттук драма театрында "Ата Мекен" партиясынын облустук конференциясы өтүп, ага миңден ашык делегат жана меймандар катышты. Алардын катарында “Улуттар биримдиги” партиясынын, Кыргызстан элдик-демократиялык партиясынын, үй куруучулардын, Орусиядагы мигранттардын ассоциацияларынын өкүлдөрү катышты. Чыгармачыл интеллигенциянын атынан “Айтыш-фильм” киностудиясынын жетекчиси Садык Шер-Нияз, журналист Шайырбек Абдрахманов болду. Катышкан коноктор эмне себептен “Ата Мекен” партиясын тандап алышкандыктарына токтолушуп, партиянын кыргыз өлкөсүндөгү эң алгачкылардан болуп негизделген партия экендигин, партия өзүнүн чейрек кылымдык тарыхында бай саясий тажрыйба топтоп, адилеттик үчүн өз учурунда башкаруу режимине каршы күрөшүп, 2005-2010-жылдары элдик көтөрүлүштү жетектөөнүн башында турганын айтышты.

“Ата Мекен” түзүлгөн күндөн баштап өзүнүн принциптеринен тайбай, бүгүнкү күндө башка партиялардын алдынкы катарында туруп, таза шайлоолорго негизделген саясий атаандаштыкты, туруктуу саясий системди сунуштап, аны турмушка ашырууга аракет кылган, бул жээктен тигил жээкке секире качпаган, бекем саясий эркиндикке ээ кыргыз жериндеги жападан-жалгыз көз карандысыз партия экени белгиленди.

Конференцияда “Ата Мекен” партиясынын лидери Өмүрбек Текебаев сөз сүйлөп, бүгүн коомчулук радикализмдин үч түрүнө каршы күрөшүүсү керектигин айтты, алар: саясий, экономикалык жана диний радикализм.

"Тилекке каршы, бүгүнкү күндө саясий радикализм диктатураны пайда кылып, соттордун баш аламандыгын жаратып, бул коомчулукту чайпалтууда. Бүгүнкү саясий системдин өзөгүн бийликте көзөмөлдүн жоктугу, башкаруучу топтун мыйзамды тоготпой каалаганын кылып жаткандыгы түзүүдө. 

Диний радикализмге кайрылсак, СССРдин кулашы менен калктын руханий жан дүйнөсүндө боштук пайда болуп, ушундай олку-солку абалдан пайдаланууга аракет кылгандар арбын болду. Учурдан пайдаланган диний күчтөр өздөрүнүн көз карашын, идеяларын таңуулап, коомчулукту дендароо кылууга аракетин улантып келет. Ислам радикализми ошолордун катарында турат. 

Ошондой эле социалисттер рыноктук экономиканы колдойт, бирок рыноктук радикализмге бекем каршы чыгып келген жана чыгып жатат. "Биз коомдун жашоосун коммерциализация кылууга каршыбыз. Иш жүзүндө эркин рыноктук моделдин атаандашы жок дегенибиз турмушта мифке айланып отурат. Көрсө, рынок учурунда дагы сатууга жана сатып алууга мүмкүн болбогон көөнөрбөс дөөлөттөр бар тура. "Ата Мекен" социалисттик партиясы ошол үчүн күрөшөт.

2010-жылы биз бир үй-бүлөнүн башкаруусуна жол бербейли деп саясий күрөшкө чыкканбыз. Тилекке каршы, максатыбызга жеткен жокпуз, анткени бүгүнкү күндө өлкөдө бир партиянын башкаруусу өкүм сүрүүдө. Сот системи талкаланды, соттордун бийликтен көз каранды экендигин коомдук активист Уран Ботобековго жана Ош шаарынын экс-мэри Мелис Мырзакматовго карата чыгарылган соттун чечимдеринен көрүүгө болот. Эгерде бүгүнкүдөй жол менен бара берсек, биз кайрадан 2010-жылга чейинки диктатурага жана соттук баш аламандыкка толук келип калышыбыз мүмкүн”,- деди Текебаев.

“Ата Мекен” партиясынын лидеринин пикирине караганда, Мырзакматовго карата чыгарылган сот өкүмү - аны шайлоого катышуу мүмкүнчүлүгүнөн ажыратып, айрым партияларга артыкчылык берүү максатында саясий жактан алдын ала даярдалган чечим.

"Ош облусунда партиянын активисттерин аңдуу, аларды коркутуу иштери жүргүзүлүп жатыптыр. Биз азыр 2010-жылдагы бийликке каршы күрөшүп, балдарыбыз канын төккөн мезгилдерге кайтып бара жатабыз. Кыргыздар айткандай, кыргыз өлкөсүндө ”түшпөс хандар” болгон эмес, бир жылдан кийин президент алмашат. Ошондуктан чиновниктерге "аша чаппагыла" деп эскертет элем”,- деди Өмүрбек Текебаев.