Баткен. Сох-Кан-Зардалы жолунда жарылган жерден унаалар дагы деле кыйынчылык менен өтүүдө

Баткен районунун Дара айыл аймагындагы Жаңырык айылында 2015-жылдын 23-июлунда Транспорт жана коммуникация министрлигинин балансындагы Сох-Кан-Зардалы унаа жолунун 32-33-чакырымында жолдун үстүнкү тарабында жолдон бийиктиги 100 метр, туурасы 300-400 метр, узундугу 500-600 метр болгон түздүктүн 9-10 жеринен жер жарылган. Жарылган жараканын ортосундагы кээ бир жерлер 40-50 сантиметрге чөккөн,  көлөмү болжол менен 2 миллион кубду түзөт. Ошондой эле унаа жолдун жарымынан узундугу 20 метр жарака пайда болгон. Бул тууралуу 29-июлда Өзгөчө кырдаалдар министрлигинин басма сөз кызматы билдирди.

2015-жылдын 23-июлунда Баткен райондук жарандык коргонуу комиссиясы жеринде көрүп, акт жазып, өкмөттүн Баткен облусундагы өкүлчүлүгүнө кайрылган. Анын негизинде Баткен облусундагы өкүлчүлүк Транспорт жана коммуникация министрлигине маселени иликтеп, тийиштүү чара көрүү жагын суранып кат жөнөткөн. 2015-жылдын 28-июлуна карата алынган маалыматтарга таянсак, автоунаалар дагы деле өтө кыйынчылык менен өтүүдө.

"Жогорудагы аймакта эгерде узак мөөнөткө жамгыр жааса же жер титирөө катталса, жер көчкү жүрүп, унаа жолду басып, Көк-Суу дарыясын тосуп калуу коркунучу бар. Ошондуктан Дара айыл аймагынын жашоочуларынын коопсуздугун эске алып, тез арада коркунучтун алдын алуу зарыл",- деп билдирет ӨКМнын басма сөз кызматы.