Муфтий Токтомушев ар түрдүү согушчул агымдардын интернет аркылуу жарыялаган чакырыктарына азгырылбоого үндөгөн кайрылуу жасады

"Ар кандай жаман чакырыктарга азгырылбай, өзүбүздү оңдойлу. Жалпы адамзат үчүн, жан-жаныбарлар үчүн эң зарыл болгон нерсе - тынчтык. Тынчтык болсо, баары жакшы болот. Согуш болсо, баары жаман болот. Ал эми тынчтыктын кадырын согуш болуп жаткан жердеги эл билет дегендей, учурдагы ар түрдүү провокациялар - тынч элди дүрбөлөңгө салчу, кан төгүүнү алып келүүчү иштер. Акылман, даанышман элибиздин, улуу мусулман улутубуздун жана куттуу жерибиздин ыркы кетип, баш аламан болушуна жол бербешибиз керек.

Ислам - бул террор эмес, ал эми террордук жардыруу исламдын пейилинен эмес. Жалпыңыздарга кайрыларым, кайсы жерде болбосун, биримдикке салым кошуңуздар, ажырымга,
бөлүнүп-жарылууга жол бербеңиздер. Ар түрдүү согушчул агымдардын интернет аркылуу чакырган чакырыгына жооп берип, эки момунду чабыштырган дин душмандарынын курмандыгына айланбаңыздар. Элибиздин тынчтыгы абдан маанилүү. Баарыбыз бирге тынчтыкка кол суналы",- деп айтылат кайрылуусунда.