Нарында жол коопсуздук кызматкери “Эл сүйгөн жетекчи” наамына татыктуу болду

Кыргыз Республикасынын “Ардактуу аксакалдар жана айымдар” коомдук бирикмеси тарабынан июль айындагы КРнын Жол көзөмөлдөө кызматынын кесиптик майрамына карата Нарын облусунун аймагындагы айдоочулардан Жол көзөмөлдөө кызматынын аткарып жаткан иш-аракеттери тууралуу сурамжылоо жүргүзүлгөн. Анда тургундар Нарын облусунун жол көзөмөлдөө кызматкерлеринин аткарып жаткан иштерине жылуу пикирин билдиришкен. Мындан улам 2015-жылдын 29-июль күнү Нарын ОИИБинин Жол кыймылын көзөмөлдөө взводунун командири, милициянын майору Таалайбек Ибраимовго “Эл сүйгөн жетекчи” наамы төш белгиси менен тапшырылды. Бул тууралуу Нарын облустук ички иштер башкармалыгынын басма сөз кызматы билдирди.

Таалайбек Ибраимов ички иштер органдарында 1988-жылдан бери, ал эми Жол көзөмөлдөө кызматында 1992-жылдан бери кызмат өтөп келе жатат.