Бишкекте алдамчылыкка шектелип 47 жаштагы аял кармалды

Бишкекте алдамчылыкка шектелип 47 жаштагы аял кармалды. Бул тууралуу Бишкек ШИИББинен 1-августта билдиришти.

Маалыматка караганда, милицияга арыз менен 67 жаштагы С.Сулайка кайрылып, 2014-жылдын ноябрь айында арыздануучуну батирин күрөөгө коюуга көндүрүп, андан соң 10 миң доллар акчасын алган Гүлмира Намазовага карата чара көрүүнү суранган. Мындан сырткары милицияга кайрылган 42 жаштагы И.Нурбек аттуу жаран Г.Намазова жер тилкесин алып берем деп 14 500 доллар акчасын алып, бербей жүргөнүн билдирген. Ошондой эле арыз менен М.Мирлан кайрылып, 4 миң долларга алданганын айткан. 

Тергөө амалдарынын жүрүшүндө алдамчылыкка шектелип 1968-жылы туулган Намазова Гүлмирахан Курбанахуновна кармалган. Шектүүдөн жабыркагандар (0554) 10-21-29 номери аркылуу милицияга билдиришсе болот.