Кыргыз тоолорунда орусиялык альпинисттер каза болушту

Баткен облусундагы Каравшин капчыгайында 3 орусиялык альпинист каза болду. Бул тууралуу бүгүн, 4-августта Орусиянын Альпинизм федерациясынын басма сөз кызматы билдирди.

Маалыматка ылайык, окуя 30-июлда орун алган. "Сөөктөр тик учак менен Ош шаарына жеткирилди. Учурда аларды жөнөтүүгө керектүү документтер даярдалууда. Болжол менен 6-августта Москва шаарына жеткирилет",- деп билдирет мекеме.

Адистердин алдын ала маалыматтарына таянсак, орусиялык альпинисттер жардан аркан менен түшүп баратканда кулап кетишкен. Буга жамгыр аралаш кардын жаашы себеп болгон.

Ошондой эле аталган федерация курман болгон альпинисттердин аттарын жарыялады. Алар: Павел Марковских, Сергей Шпиз, Илья Поселяничев.