"Ислам мамлекети" террордук тобунун атынан кыргыз элине жасалган видеокайрылуу боюнча кылмыш иши козголду

"Ислам мамлекети" террордук тобунун атынан кыргыз элине жасалган видеокайрылуу боюнча кылмыш иши козголду. Бул тууралуу бүгүн, 6-августта УКМКнын басма сөз билдирди. 

Маалыматка караганда, учурда “террорчулук мүнөздөгү кылмыштарды жасоого тартуу же аларды жасоого башка көмөктөрдү көрсөтүү”, “улуттук, расалык, диний же регион аралык кастыкты козутууга багытталган уюшкан иш-аракет”, “жалданмачылык” беренелери боюнча кылмыш иши козголгон.

Айта кетсек, 25-июлда "Ислам мамлекети" террордук тобу "Кыргызстандын элине кайрылуу" деп аталган видеотүрмөк жарыялаган. Видео интернетке (YouTube) 25-июлда кечинде чыгып, жарыялангандан 6 саат өткөндөн кийин YouTube видеохостингинин администрациясы аны өчүргөн. 9 мүнөткө созулган тасмада кыргыз тилинде сүйлөгөн белгисиз жарандын кайрылуусу орун алып, анда "Ислам мамлекети" тобуна кошулууга чакырык ташталганы айтылган. Кайрылууда Кыргыз Республикасы "каапырлар өлкөсү" деп аталып, жарандар адамдар тарабынан ойлоп табылган мыйзам, эрежелер менен жашап жатканы белгиленген. Кийин кайрылуу жасаган адамдын аты-жөнү такталып, Токтогул районунун тургуну экени аныкталган.