Орусияда сот баңгизат менен кармалган жумушсуз кыргыз жарандарын 9 жыл 6 айга эркинен ажыратты

Орусиянын Самара облусунун соту баңгизат менен кармалган Х.Т. жана У.Т. аттуу жумушсуз 2 кыргыз жаранын 9 жыл 6 айга эркинен ажыратуу боюнча чечим чыгарды. Бул тууралуу бүгүн, 6-августта аталган облустун прокуратурасынын басма сөз кызматы билдирди.

Маалыматка ылайык, 2014-жылдын 23-декабрында аталган жарандар 1 килограммдан ашуун баңгизат менен кармалышкан. Андан соң Коопсуздук кызматынын кызматкерлери алардын жашаган жеринен 123 грамм героин табышкан.

Сот кылмышка шектүүлөрдү күнөөлүү деп таап, аларды 9 жыл 6 ай мөөнөткө эркинен ажыратуу боюнча өкүм чыгарды жана аларга 200 миң рубль айып пул салды. Өкүм мыйзамдуу күчүнө кире элек.