Ошто мыйзамсыз сакталган куралдын огунан жаш жигит каза болду

Ош шаарында мыйзамсыз сакталган тапанчанын огунан 20 жаштагы жигит каза болду. Бул тууралуу SUPER.KG порталына Ош ШИИБинин басма сөз кызматынан билдиришти.

Маалыматка ылайык, кечээ, 5-августта саат 20:30 чамасында жаштардан турган компания Тилеке баатыр көчөсүндө Ак-Буура дарыясына түшүп эс алып, үйгө унаа менен баратышкан. Жигиттердин бири арткы орунда тапанча менен ойноп жатып кокустан жанында отурган шеригине ок чыгарып алган. Башына жаракат алган Э.М. аттуу жаран ооруканага жеткирилген, бирок ал эсине келбей каза тапты.

"Бул факт боюнча “денеге атайлап оор зыян келтирүү” беренесинин негизинде кылмыш иши козголду. Ок чыгарган жаран убактылуу кармоочу жайга киргизилди. Ал тапанчаны таап алганын айтууда. Учурда бул курал экспертизага жөнөтүлдү",- деп маалымдашты басма сөз кызматынан.