"Мародёрлук боюнча кылмыш иштеринин материалдарын уурдаган" деп шектелгендер кармалды

"Чүй облустук сотунун судьясынын иш бөлмөсүнөн Апрель окуясындагы мародёрлук боюнча кылмыш иштеринин материалдарын уурдаган" деп шектелип 3 жаран кармалды. Бул тууралуу бүгүн, 6-августта Бишкек ШИИББинен билдиришти.

Маалым болгондой, аталган материалдарды уурдоого буйрутма бергендер СИЗОдо отурган Абдували Акжолов жана Абдулла Юсупов экени аныкталды. Бул эки жаран 2010-жылдагы Апрель окуясында мародёрлук фактылары боюнча соттолууда.

Айта кетсек, 30-июлда болжол менен саат 03:28де белгисиз бет капчан эки адам Чүй облустук сотунун экинчи кабаты аркылуу кирип, судья А.Жумагуловдун эшигин талкалап, иш бөлмөсүндөгү сейфтен 8 томдон турган жазык иштин 6 томун уурдап баратып өрт коюп кеткен. Анда Абдуллажан Юсупов, Азамат Шергазиев, Дастан Оморов жана А.Акжолов менен Р.Жоробаеванын кылмыш иштери боюнча жазык иштер жана Апрель окуясындагы мародёрлук боюнча да иштер уурдалган.