Орусиядагы мигранттардын "кара тизмесинде" бар же жок экенин текшерүү жолу көрсөтүлдү

Орусиянын Федералдык миграциялык кызматы мигранттардын "кара тизмесине" киргизилген кыргыз жарандарынын аты-жөнү жазылган тизмесин кыргыз тарапка бербей жатат. Мындай чечимин аталган мекеме "Жеке маалыматтарды коргоо жөнүндө" мыйзамына таянып түшүндүрүүдө. Бул тууралуу бүгүн, 10-августта маалымат жыйынында эмгек, миграция жана жаштар министринин орун басары Алмаз Асанбаев билдирди.

Анын айтымында, мындан улам кыргыз жарандары “кара тизмеде” бар же жок экенин өздөрү текшериши керек.

“Орусиянын аймагына кирүүнү пландаган жаран Орусиянын Федералдык миграциялык кызматынын расмий интернет-сайтына кирип, “Маалыматтык кызматтар” (“Информационные ресурсы”) барагына кириши керек. Андан соң “Чет өлкөлүк жарандарга жана жарандыгы жок адамдарга Орусиянын аймагына кирүүгө уруксаттын жоктугуна негиздеринин бар же жоктугун текшерүү” (“Проверка наличия оснований для неразрешения въезда на территорию РФ иностранным гражданам и лицам без гражданства”) бөлүмүнө кирип, суроолорго так жана туура жоопторду бериши зарыл”,- деп түшүндүрдү Асанбаев.

Мындан тышкары ал 2015-жылдын 20-июлунан тарта жума сайын жаңыланып турарын баса белгиледи.