Эльвира Сариева: "Ата-энелер стандартка туура келчү мектеп формасын сунуштай алышат"

Билим берүү жана илим министри Эльвира Сариева 11-августта коомчулукта талкууга алынып жаткан окуучулардын мектеп формасы тууралуу билдирүү жасады. Белгилүү болгондой, министрликте мектеп формасы тууралуу түшкөн сунуштарды карап чыгуу боюнча атайын топ түзүлгөн. 

"Кийинки аптадан баштап мектептерде ата-энелер чогулушу өткөрүлөт. Ал жерде мектеп жетекчилиги менен биргеликте окуучулардын мектеп формасына байланыштуу маселе каралат. Эгер сиздер сунушталган кызыл пиджак менен боз юбканы жакшы вариант катары көрбөсөңүздөр, ак көйнөк, кара юбканы калтырсаңыздар болот. Же болбосо, өкмөттүн токтомуна ылайык, стандартка туура келген форманы сунуштай аласыздар.

Мектеп жетекчилиги көрсөтүлгөн стандартка төп келе турган форманы гана талап кыла алат. Билим берүү министрлиги белгилүү бир стандарттарды кабыл алат, ата-энелер балдары үчүн кайсы форма туура келерин тандайт. Стандартка туура келчү кийимдердин катарындагы кыздардын (кофта, жилет, юбка, шым, көйнөк, фартук, пиджак) жана балдардын (көйнөк, жилет, шым жана пиджак) кийимдери кара, боз, кочкул кызыл, көк түстө болушу керек",- дейт министр.