Бишкекте 21 жаштагы жигитти уурдап, туугандарынан 30 миң сом талап кылгандар кармалышты

Бишкекте 21 жаштагы жигитти уурдап, туугандарынан акча талап кылгандар кармалышты. Бул тууралуу бүгүн, 13-августта Бишкек шаардык ички иштер башкы башкармалыгынан билдиришти.

Маалыматка караганда, 22-июль күнү белгисиз төрт адам 21 жаштагы А.А. аттуу жигитти күчтөп унаага салышып, Бөкөнбаев көчөсүндөгү батирлердин бирине алып барышкан. Андан соң аны сабап, 30 миң сом талап кылышкан. Эжесине да телефон чалышкан, бирок ал сураган акчаны берүүдөн баш тарткан. Ал эми 23-июль күнү саат 07:30 чамасында кылмышкерлердин этиятсыздыгынан улам жигит терезеден секирип, жыгач тосмого илинип калган. Мындан улам кылмышкерлер батирди таштап качып кетишкен. Жабырлануучу кайра балкон аркылуу батирге кирип, милицияга кабарлаган. 

Жүргүзүлгөн иликтөө иштеринин негизинде 12-августтан 13-августка караган түнү кылмышка шектүү катары 19 жаштагы Шамил, 24 жаштагы Алексей, 26 жаштагы Артур кармалган. Учурда алар өз күнөөлөрүн моюндарына алышып, тергөө амалдары жүрүүдө.