Кадамжайдагы орто мектепте чек арачылардын жашоосу чагылдырылган класс ачылды

Баткен облусунун Кадамжай районундагы орто мектепте чек арачылардын жашоосу чагылдырылган класс ачылды. Бул тууралуу 14-августта Чек ара кызматынан билдиришти.

Маалыматка караганда, "Кадамжай-унаа жол" көзөмөл-өткөрүү бекетинин чек арачылары Кадамжайдагы
№17-орто мектептеги классты оңдоодон өткөрүп, жасалгалашкан. Дубалдарга чек арачылардын бир күндүк иш күнү жөнүндө маалымат, чек арадагы тынчтыкты сактоодо эрдик көрсөткөн баатырлар тууралуу баяндама жазылып, сүрөттөрү илинди. 

“Жаңы класс патриоттуулукка үндөгөн сүрөттөр менен жасалгаланды. Бул биздин окуучуларга берген белегибиз. Балдар менен жолугушканда алардын аскердик жашоо жөнүндө билүүгө кызыкдар экенин көрүүгө болот. Биздин аракетибиз мекенибиздин коргоочуларын тарбиялоого салым кошот деген үмүттөбүз",- дейт жогорудагы көзөмөл-өткөрүү бекетинин башчысынын орун басары Владислав Голощапов.