Чүй ОИИББи: "Кичинекей кыздардын көзүнчө мурунку аялын бычактап өлтүрүүгө шектелген адам кармоо учурунда өз өмүрүнө кол салды"

Мурунку жарандык никедеги аялын өлтүрүүгө шектелген адам кармоо учурунда өз өмүрүнө кол салды. Бул тууралуу 18-августта Чүй ОИИББинин басма сөз кызматы билдирди.

Милицияга 18-августка караган түнү Новониколаевка айылынын тургундары кайрылып, мыкаачылык менен өлтүрүлгөн аялдын денеси табылгандыгын кабарлашкан. Окуя болгон жерге келген тергөөчүлөр ашканада жаткан Кара-Кулжа районунда 1977-жылы туулган А.Айбарчындын бычакталган денесин көрүшкөн. Соттук-медициналык эксперттер маркумдун көкүрөк, колтук тарабына жана колдоруна 8 жолу бычак сайылганын аныкташкан. 

Иликтөөнүн жүрүшүндө А.Айбарчын аталган айылда эки айдан бери батирде 11 жана 8 жаштагы кыздары менен жашап келгени белгилүү болгон. Мындан сырткары каргашалуу окуя болгон түнү маркумдун үйүнө анын мурунку жарандык никедеги күйөөсү (үч жылдай бирге жашап, бир нече ай мурун ажырашкан) келип, экөө уруша кетишкен. Натыйжада мурунку күйөөсү кыздардын көзүнчө аялды бычактап салганы аныкталган. Андан соң белгисиз тарапка качып кеткен.

Факты боюнча "адам өлтүрүү" беренеси менен кылмыш иши козголуп, шектүү катары Кара-Кулжа районунда 1966-жылы туулган Ж.Акимжанды кармоо аракеттери жүргүзүлгөн. Бүгүн Кара-Балта шаарынын четиндеги талаада колго түшүрүлгөн Ж.Акимжан кармоо учурунда өз өмүрүнө кол салган. Шектүүнү дарыгерлер текшерип, жарааты коркунучсуз экени маалымдалды. Шектүү тергөө абагына киргизилип, иликтөө иштери жүрүүдө.