Коррупция боюнча айыпталган депутат Хажимурат Коркмазовдун соту 1-сентябрга жылдырылды

Бүгүн, 19-августта Жогорку Соттун кылмыш иштери жана административдик укук бузуулар боюнча соттук коллегиясында "коррупция" беренеси менен айыпталган депутат Хажимурат Коркмазовдун соту 1-сентябрга жылдырылды. Бул тууралуу Жогорку Соттун басма сөз кызматы билдирди.

Маалыматка караганда, жактоочу К.Ж.Загибаев депутат ден соолугуна байланыштуу 13-августтан бери бейтапканада дарыланып жаткандыгын айткан. "Ошондой эле өзү Ош, Жалал-Абад жана Ысык-Көл облустарына 10 күнгө жумуш боюнча кетип жатканын кошумчалаган. Кылмыш иши каралган соттук отурумга депутат да, жактоочу да катыша албай турганын билдирип, соттук процессти өткөрбөй турууну суранган. Прокурор жактоочунун суранычына макулдук берип, коллегия сот отурумун жылдырды",- деп айтылат маалыматта.