Ленин чокусунан 6 тоннага жакын таштанды чогултулду

Ленин чокусунан 6 тоннага жакын таштанды чогултулду. Мындай маалыматты бүгүн, 25-августта SUPER.KG порталына Жергиликтүү жаратылышты коргоо жана токой чарбасын өнүктүрүү фондунун аткаруучу директорунун орун басары Булан Шаршеев билдирди. Анын айтымында, бийик чокуну акыр-чикирден тазалоо иш-аракеттери быйылкы жылдын июнь айында башталган.

“Учурда Ленин чокусунан 5-6 тонна таштанды чогулду. Бул акция 1-сентябрга барып аяктайт, ага чейин тазаланган таштандынын көлөмү 8-9 тоннага жетиши мүмкүн. Иш-чараны өткөрүүгө деп фонддун эсебинен 2 миллион 120 миң сом бөлүнгөн. Мындан тышкары демөөрчүлөр 1 миллион сомдон ашык каражат беришти.

Тазалоо жумуштарына альпинисттер жана жергиликтүү тургундар тартылды. Атайын даярдыгы бар альпинисттер 5300-6100 метр бийиктикке, ал эми жергиликтүү жашоочулар 4200 метрге чыгып жатышат. 1 килограмм чогултулган таштанды үчүн 90 сомдон төлөнүүдө, бирок кээ бир активисттер бекер эле иштеп жатышат.

Мындай акция экинчи ирет өткөрүлүп жатат. Биринчи жолу 2009-жылы өткөрүлүп, анда Ленин чокусунда каза болгон эки альпинисттин денеси түшүрүлгөн. Кудайга шүгүр, быйыл адамдын денесин тапкан жокпуз, консерва банкалары, батарейкалар, полиэтилен баштыктары, альпинисттердин бут кийимдери жана башка таштандылар чыгууда”,- деди Шаршеев.