Пенсионерлердин 1 миллион 870 миң сомун уурдап качып кеткен Мырзакматов Орусиядан кармалды

Жалал-Абад облусунун Кочкор-Ата шаарындагы банктардын биринин мурдагы бөлүм башчысы, эл аралык издөөдө жүргөн Акмат Мырзакматов Санкт-Петербург шаарынан кармалды. Бул тууралуу 26-августта Жалал-Абад ОИИБинин маалымат кызматынан билдиришти. Ал "банктардын биринде бөлүм башчы болуп иштеп жүргөндө пенсионерлердин банкка сактаган 1 миллион 870 миң сом акчасын уурдап качып кеткен" деген шек менен кармалды. 

Мырзакматовго карата 2013-жылы КРнын Кылмыш-жаза кодексинин 171-беренеси (ыйгарылган мүлктү ээлеп алуу) жана 350-беренеси (документтерди, мамлекеттик сыйлыктарды, штамптарды, мөөрлөрдү, бланктарды колго жасоо, даярдоо, сатуу же алардын жасалмаларын пайдалануу) боюнча кылмыш иши козголгон. 

Анын кесепетинен 10дон ашуун пенсионер зыянга учураган. Алардын ар биринин банктык эсебинде 20 миң сомдон 500 миң сомго чейин акча каражаты сакталып турган. Мырзакматовдун качып жүргөндүгүнө байланыштуу кылмыш иши убактылуу токтоп турган. 

Учурда аны кыргыз жерине алып келүү аракеттери жүрүп жатканы айтылды.