"Ала-Тоо" аянтында Эгемендүүлүк күнүнө карата даярдыктар көрүлүп, биринчи жолу 150 тонналык конструкция коюлууда (фоторепортаж)

Бишкектеги "Ала-Тоо" аянтында Эгемендүүлүк күнүнө карата даярдыктар көрүлүп, биринчи жолу 150 тонналык конструкция коюлууда. Бул тууралуу бүгүн, 27-августта SUPER.KG порталына Бишкек мэриясынын социалдык бөлүмүнүн башчысынын милдетин аткаруучу Нурбек Курманбеков билдирди. Анын айтымында, 31-августта өтө турган салтанаттуу концертке даярдыкты орусиялык ишкана көрүүдө.

“Белгилүү болгондой, президент Алмазбек Атамбаевдин чакыруусу жана “Газпром Кыргызстан” компаниясынын каржылоосу менен Эгемендүүлүк күнүнө карата Бишкекке Григорий Лепс, Дима Билан, Вера Брежнева жана "Ottawan" диско-дуэти келет. Майрамдык концерттин сахнасын жасалгалоо орусиялык компанияга жүктөлгөн. Алар болсо буга чейин "Ала-Тоо" аянтында коюлбаган конструкцияны орнотушууда. Жумуштар 23-августта башталган, 30-августта бүтөт. Темир кострукциянын ортосуна кыргыз герби илинет, эскиз долбоору атайын Эгемендүүлүк күнүнө ылайыкташтырылып түзүлдү”,- деди Курманбеков.

Муну менен катар учурда эски аянтта Эгемендүүлүк күнүнө арналган театрлаштырылган, ыр, бий жана оюн-зоок программасынын даярдыктары көрүлүүдө. Белгилүү болгондой, "Ала-Тоо" аянтында 31-августта эртең мененки майрамдык программага 1500 адам катышат.