Испанияда 70 жылдан бери өткөрүлүп келген "Помидор уруш" фестивалы башталды

Бүткүл дүйнөгө белгилүү болгон помидор уруш жыл сайын августтун акыркы аптасында, шаршемби күнү Испаниядагы Буньоль шаарында өтөт. Кечээ, 26-августта майрамдык фейерверк, ыр-бий, акысыз таттуулар менен бирге фестиваль старт алды. 

1945-жылдан бери өткөрүлгөн фестивалга быйыл 70 жыл болду. Бир аптага созулган иш-чаранын ачылышына 22 миңден ашуун адам катышты. Бул тууралуу чет элдик басылмалар жазып чыгышты. 

Маалыматка караганда, уюштуруучулар 150 тонна помидор даярдашкан. Помидор салынган жүк ташуучу унаалар Плаза-дель-Пуэбло шаарынын борбордук бөлүгүнө алынып келет. Атайын белги берилгенден кийин катышуучулар помидор менен бирин-бири уруп башташат.

Мындан 70 жыл мурун Буньоль шаарында жайдын аяктаганына карата өткөрүлгөн майрамдык парадда катышуучулардын бири жанындагы адамды түртүп кулатып алган. Жер-жемиштерди саткан жерде тамашалашып отуруп бири-бирине помидорлорду ыргытышкан. Полиция кызматкерлери келип чыгымды төлөөгө мажбур кылышканы менен, бир жылдан кийин ошол эле тамашадан чыккан уруштун катышуучулары өздөрүнүн помидорлору менен келип, помидор менен урушууну салтка айлантып алышкан. 1950-жылдан тартып бийлик өкүлдөрү бул иш-чарага каршылык көрсөтүүнү токтоткон.