Саламаттыкты сактоо министрлиги: Кара-Сууда диарея менен ооругандар 3 эсеге азайды

Саламаттыкты сактоо министрлиги алдын алуу иштеринин жыйынтыгында Кара-Суу районунда диарея менен ооругандардын саны 2,9 эсе кыскарганын билдирди. Былтыркы жылдын 8 айында райондук ооруканага 848 жаран кайрылса, быйыл бул мезгил аралыгында 300гө жакын адам кайрылганы айтылды.  

"Оорунун келип чыгуу себептери: балдарга энелердин туура эмес камкордук көрүшү, балдарды тамактандырууда кайнабаган сүттү же сууну, үйдө жасалган тамак-аштын мөөнөтү өтүп кеткенине карабай берүү, жеке гигиенаны сактабоо, жуулбаган мөмө-жемиштерди колдонуу",- деп билдирет министрлик.

Оорунун алдын алуу үчүн бир катар талаптарды аткаруу сунушталды. Алар:

1. Жеке гигиенаны бекем сактоо;

2. Тамактануу алдында колду самындап жууп-тазалоо;

3. Жуулбаган мөмө-жемиштерден баш тартуу;

4. Даяр тамак-аш (нан, сыр жана башка) менен чийки эт, мөмө-жемиштерди бир баштыкка салып келбөө;

5. Тамак-ашка чымындын конушуна жол бербөө;

6. Бат бузулуучу тамак-ашты муздаткычта сактоо;

7. Балдарды жеке гигиенаны сактоого үйрөтүү;

8. Көчөдөн бат бузулуучу тамактарды сатып албоо;

9. Балдар ооруганда өз алдынча дарылабай, дарыгерге кайрылуу.