27-августка карата Бишкекте 16 чакырымдан ашуун эскирген электр чубалгылары алмаштырылды

“Түндүк электр”ишканасы Бишкек шаарында жаңы кабель чубалгыларын куруу жана эскилерди алмаштыруу иштерин алып барууда. 27-августка карата 16 чакырымдан ашуун кабель чубалгылары алмаштырылды. Бул тууралуу "Түндүк электрдин" басма сөз кызматы билдирди.

Кабелди тартуу үчүн траншея казуу иштери Тыналиев, Ахунбаев, Байтик баатыр, Медеров, Абдрахманов, Москва көчөлөрүндө жүргүзүлүүдө. Мындан кийин иштер К.Карасаев атындагы Бишкек гуманитардык университети тарапта улантылат. "Борбор калаабыз боюнча 40 чакырымга жакын эскирген кабель тармактарын алмаштыруу үчүн 22 миллион сом каралган. Бишкек шаарындагы 1950-1994-жылдары тартылган электр чубалгылары өз мөөнөтүн иштеп бүткөн, азыр алардын өткөрүмдүүлүгү заманбап жүктөмгө туруштук бере албайт",- деп айтылат маалыматта.