Жалал-Абад облустук ички иштер башкармалыгына 9 жаңы кызматтык унаа тартууланды

Жалал-Абад облустук ички иштер башкармалыгына Ички иштер министрлиги тарабынан 9 жаңы кызматтык унаа тартууланды. Бул тууралуу бүгүн, 28-августта башкармалыктын басма сөз кызматынан билдиришти. Маалым болгондой, унаалар дээрлик бардык райондук ички иштер бөлүмдөрүнүн кылмыш иликтөө кызматкерлерине тапшырылат.

Аталган облустун ички иштер башкармалыгынын орун басары, милициянын полковниги Ибрагим Шатманалиев: “Мындай кадам оор кылмыштардын көп узабай ачылышына өбөлгө жаратат”,- деп билдирет.

Ошондой эле эртең, 29-август күнү ички иштер министри Мелис Турганбаев Жалал-Абад облусуна келип, кызматтык автоунааларды тапшыруу аземине катышат.