Нарын. Кочкор районунун акими мыйзамдуу иштээрин айтып, аны каралоо аракеттери жөн гана саясий оюн экенин билдирет

Бүгүн, 2-сентябрда Нарын облусунун Кочкор районунун акими Нурбек Жусупбеков ээлеген кызматында мыйзамдуу иштээрин айтып, аны каралоо аракеттери жөн гана саясий оюн экенин SUPER.KG порталына билдирди. Район башчысынын айтымында, 2003-2006-жылдары анын жоопко тартылганы чын жана ага жараша учурунда айып пул төлөгөн.

“2003-жылы элге арпага, буудайга деп насыя алып берчүбүз, ошону убагында төлөбөгөндүктөн, мага айып пул салынган. Ал эми 2006-жылы курулуп жаткан клубга балдарды жумушка алып, мунун айынан да акчалай айыпка жыгылгам. 

Кийинки учурларда ушуга байланыштуу асылуулар көп боло баштаганда ээлеген кызматта иштээрим мыйзамдуу же мыйзамсыз экенин өзүм да билгим келип Ички иштер министрлигинин маалымат борборуна кайрылгам. Ал жерден мага “Мунапыс жөнүндөгү” мыйзамга, Кылмыш жана жаза кодексинин 76-берененин 2-бөлүгүнө ылайык, 2006-жылы соттолгонум жоюлду деп жооп жазышты. Ал эми жергиликтүү тургун Мурсакожо Мендиев “Жергиликтүү мамлекеттик администрация жөнүндөгү” мыйзамга таянып "соттолгон адам мамлекеттик кызматта иштегенге укугу жок" деп каршы чыгып жатат. Аталган мыйзам 2011-жылы чыгып, ошол күндөн баштап күчүнө кирери жазылган. Ал эми мен жоопкерчиликке тартылган жыл 2003 болуп турат. Эгер мен мыйзамдуу иштебегенде, кызматымдан өзүм эле кетип калмакмын. Бул жерде жөн гана шайлоо алдында менин ордума башка бирөөнү коюу маселеси турушу мүмкүн”,- деди аким.