Отун-энергетика комплексин жөнгө салуу департаментинин жооптуу өкүлүнө кылмыш иши козголду

Башкы прокуратура Энергетика жана өнөр жай министрлигине караштуу Отун-энергетика комплексин жөнгө салуу департаментинин жооптуу кызматкерине кылмыш ишин козгоду. Кызматкер "кызматтык абалын кыянаттык менен пайдалануу", "бюджеттик каражаттарды мыйзамсыз пайдалануу" жана "кызматтык бурмалоо" беренелери боюнча айыпталып жатканын Башкы прокуратурадан 3-сентябрда билдиришти. 

Маалыматка таянсак, кызматкер 2012-жылы кызматтык автоунаасына кошумча тетик сатып алгандыгы боюнча И.Ш. аттуу жеке ишкер менен жасалма сатуу-сатып алуу келишимин түзгөн. Бирок бюджеттин эсебинен берилген 120 000 сом айдоочунун күнөөсү менен аварияга кабылган башка кызматтык автоунааны оңдотууга мыйзамсыз жумшалган.    

Аталган факт боюнча териштирүү башталганы айтылды.