Борбордо "пикир келишпестиктен таксистти өлтүргөн" деп шектелип үч жаран кармалды

Бишкекте уруштун айынан таксистти өлтүргөнгө шектелип үч жаран кармалды. Муну бүгүн, 3-сентябрда Бишкек ШИИББинин басма сөз кызматынан билдиришти. 

Маалыматка караганда, окуя 26-августта саат 03:40тар чамасында болгон. Турусбеков жана Киев көчөлөрүнүн кесилишинде турган Н.К. аттуу таксистке 2 бала менен 1 кыз келген. Жол кире жөнүндө сүйлөшүп жатып уруша кетишкен. Эки жигит айдоочуну сабап кетишкенден кийин таксист диспетчерге болгон окуяны айтып,
эс-учун жоготкон. Башка таксист “Тез жардам” унаасын жана милиция кызматкерлерин чакырганы менен, жабырлануучу эсине келбей каза болгон. Кылмышка шектүү катары 20 жаштагы бишкектик үч жаран кармалып, убактылуу кармоочу жайга киргизилишти. Учурда иликтөө иштери уланууда.