Барак Обама Аляскада окуучулар менен бийледи

АКШ президенти Барак Обама Аляскадагы иш сапарында жергиликтүү элдин бийин бийледи. Америкалык басылмалар жарыялашкандай, президент Диллингхэм шаарындагы мектептердин биринде окуучулар менен чогуу бийдин бир нече кыймылын кайталаган. "Мен репетиция кылдым",- деп билдирди мамлекет башчы. 

Обама жергиликтүү ашкананын даамдарын мактаганын, өзгөчө ага балыктан даярдалган тамактар жакканын жазды "ABC News" басылмасы. 

"Тамак чынында эле абдан даамдуу экен. Анан да, жаштар, силер менен өзгөчө сыймыктанам. Каада-салтыңарды сактагыла, жакшы окуп, алган билимиңерди өзүңөрдүн коомдун жыргалчылыгына жумшагыла",- деген президент жубайы жана эки кызы менен Аляскага дагы бир жолу келерин айтты. 

Эскерте кетсек, буга чейин Обаманын телеканалдардын бириндеги шоу-программага катышары, муну менен ал телешоуго катышкан биринчи америкалык президент болору жарыяланган. Өлкө лидери катышчу телепрограмманын так датасы коомчулукка белгилүү эмес.