Ош. Жапалак айыл аймагында ит кутурмадан өлгөндөн кийин үй жаныбарлары эмдөөдөн өткөрүлүүдө

Жапалак айыл аймагындагы Татар айылында жергиликтүү тургундун ити өлгөн. Ит кутурма ылаңына күмөндөлүп, анын башы Ош зоналдык-ветеринардык диагностикалык борборуна жөнөтүлгөн.

Натыйжада ит кутурма оорусу менен ооругандыгы тастыкталган. Бул тууралуу 8-сентябрда Өзгөчө кырдаалдар министрлигинин басма сөз кызматы билдирди.

Маалыматка караганда, бүгүнкү күндө аталган борбордун кызматкерлери тарабынан Татар айылында 2 баш ири мүйүздүү мал, 12 баш майда жандык, 1 эшек жана 21 ит-мышык кутурма оорусуна каршы эмдөөдөн өткөрүлдү.

Мындан сырткары бул оорунун алдын алуу максатында жергиликтүү элге түшүндүрүү иштери жүргүзүлдү.