Кыргыз балбаны Арсен Эралиев Бразилияда өтүүчү Олимпиада оюндарына жолдомо алды

Учурда АКШнын Лас-Вегас шаарында күрөш боюнча Дүйнө чемпиондугу өтүп жатат. 8-сентябрда орун алган кармаштарда грек-рим күрөшү боюнча 4 комплект медаль ойнотулду. Бул тууралуу мелдештин расмий сайты кабарлайт.

Маалым болгондой, бул күнү кыргыз балбаны Арсен Эралиев 59 килограмм салмакта килем үстүнө чыгып, эки атаандашын жер каратуу менен жарым финалга чыкты. Жарым финалда ал азербайжандык спортчуга утулуп калды. Ошондой эле коло медаль үчүн күрөштө да ал жеңилүү ызасын тартып, 5-орунду ээледи. Бирок мелдештин жобосуна ылайык, алдынкы 5 орундун ээси, анын ичинде Арсен “Рио-де-Жанейро-2016” Олимпиадасына жолдомо алды.

Кошумчалай кетсек, Арсен Эралиев аталган Олимпиадага жолдомо алган экинчи кыргыз спортчусу. Буга чейин жолдомого жеңил атлетика боюнча Юлия Андреева ээ болгон.