"Кумтөрдөн" 8 айда республикалык бюджетке 4,3 миллиард сом салык түштү

2015-жылдын такталган бюджетинде "Кумтөрдөн" алынган дүң кирешеге салыктык түшүүлөр 5 миллиард 515 миллион сом өлчөмүндө каралган. Каржы министрлигинин билдиришинче, бул сумма жалпы салыктык түшүүлөрдүн 6,9 пайызын түзөт. 2015-жылдын 8 айынын жыйынтыгында салыктын бул түрү боюнча республикалык бюджетке 4 миллиард 332 миллион сом түшкөнү айтылды.

"2016-жылга республикалык бюджеттин долбоорунда "Кумтөрдөн" алынчу дүң кирешеге салыктын суммасы 5 миллиард 363 миллион сом өлчөмүндө болжолдонууда. Бул ишканадан салыктык түшүүлөрдүн эсеп-кысабы 2016-2018-жылдарга "Кумтөрдүн" өндүрүшүнүн болжолдонгон көлөмдөрүнүн негизинде, "Кумтөр" боюнча макулдашууда белгиленген дүң кирешенин 13 пайыздык ченинде жүргүзүлгөн. Салыктын бул түрү боюнча түшүүлөр толугу менен республикалык бюджетке чегерилүүгө тийиш",- деп билдирет министрлик.