Каржы министрлиги: Бюджеттин ачыктыгы боюнча кыргыз өлкөсү 34-орунду ээледи

"Кыргыз мамлекетинде бюджеттик маалыматтын элге жеткиликтүүлүк даражасын аныктоо индекси 2015-жылы 54 баллды түзүп, 34-орунду ээледи",- деп билдирди Каржы министрлиги бүгүн, 10-сентябрда. Мекеменин билдиришинче, кыргыз өлкөсү бул жаатта 67 өлкөнү, мунун ичинде Казакстан, Түркия, Индия, Азербайжанды артка калтырыптыр.

"Бюджеттик ачык-айкындык индекси боюнча акыркы жыйынтык Каржы министрлигинде жетекчи алмашкан кезде бул маселе боюнча ырааттуулук бар экенин айгинелеп турат. Быйыл Каржы министрлиги болжолдуу бюджеттик билдирүүнү, 2016-жылга бюджеттин долбоорун даярдады, азыр 2016-жылга жарандык бюджетти даярдоодо. Учурда бюджеттик ачык-айкындыкты камсыз кылууга карата Эл аралык бюджеттик өнөктөштүктүн талаптарын эске алуу менен негизги бюджеттик документтердин форматтарын иштеп чыгууда",- деп билдирет министрлик.

Маалымат үчүн:

Индекс 8 бюджеттик документтин жеткиликтүүлүгүнөн түзүлөт. Документтердин катарына: бюджеттик билдирүү, бюджеттин долбоору, бекитилген бюджет, жарандык бюджет, бюджеттин аткарылышы тууралуу жыл ичиндеги отчёттор, жарым жылдык отчёт, жылдык отчёт, аудитордук отчёт кирет.