Ошто ден соолугунун мүмкүнчүлүгү чектелген балдарды мектепке даярдоого шарт түзүлдү

10-сентябрда Ош шаардык ден соолугунун мүмкүнчүлүгү чектелген балдардын реабилитациялоо борборунда мектепке чейинки даярдоо классынын ачылышы болду. Анда ден соолугунун мүмкүнчүлүгү чектелген 5 жаштан 7 жашка чейинки курактагы 50дөн ашык бала окуйт. Бул тууралуу Ош шаардык билим берүү башкармалыгынан кабарлашты.

Маалыматка ылайык, анда балдар 4 ай бою мектепке даярдалышат. Бул жайда 2 бөлмө оңдолуп, ошондой эле ойноо аянтчасы да оңдолуу алдында турат. Мындагы балдар билим гана алып тим болбостон, психолог, дефектолог, дарыгерлердин көзөмөлүндө болуп, дарыланып да турушат.

Иш-чарага ата-энелер, тиешелүү тармактардын жетекчилери жана Ош шаардык билим берүү башкармалыгынан өкүлдөрү катышты.

Кошумчалай кетсек, Ош шаардык социалдык коргоо башкармалыгында 950гө жакын ден соолугунун мүмкүнчүлүгү чектелүү бала каттоого алынса, алардын 722син 18 жашка чейинкилер түзөт.