Фейсбуктун негиздөөчүсү, миллиардер Марк Цукерберг иштеген жерин дүйнөгө көрсөттү

Интернеттеги "Фейсбук" аталышындагы эң ири социалдык тармагынын негиздөөчүсү Марк Цукерберг түз эфирде компаниянын жаңы кеңсесин көрсөтүп, жумуш ордуна экскурсия жасады. Анын жүрүшүндө Цукерберг компания жаңы кеңсеге эки ай мурун көчкөнүн айтып берди.

Видеодо Фейсбуктун кеңсесинде кызматкерлер өз-өзүнчө иш бөлмөлөрүндө эмес, баары чогуу кенен жайда иштешкени көрүнөт. Алардын ортолорунда дубалдар жок болгондуктан, ким эмне кылып жатканын көрө алышат жана бири-бири менен ачык сүйлөшө алышат. Цукербергдин айтымында, мындай шартта иштөө команда үчүн жаңы идеялар менен алмашууга жакшы жардам берет. Ошондой эле ал өзүнүн иштеген жайын көрсөттү. Анын столу башка кызматкерлердикинен айырмаланбаганы көрүнөт.

Айта кетсек, "Форбстун" версиясы боюнча Марк Цукерберг 33,4 миллиард долларга ээ болуп, дүйнөнүн маалыматтык технологиялар тармагындагы эң бай ишкерлердин рейтингинде 4-орунда турат.