Орусияда исламдын туура эмес агымын колдогонуна өкүнгөнүн айткан кыргыз жаранын коё беришти

Орусиянын Якутия Республикасында "Таблиги Жамаат" эл аралык диний уюмунун мүчөсү - кыргыз жараны кармалды. Бул тууралуу бүгүн, 18-сентябрда күч түзүмдөрүнө шилтеме берүү менен орусиялык басылмалар жазышты.

Маалыматка ылайык, кыргыз жараны быйыл Якутскка жумуш издөө максатында келген. Буга чейин ал Индияда жарым жыл болуп, "Таблиги Жамаат" уюмунун мүчөлөрү менен таанышып, тажрыйба алмашып жүргөн. Мындан тышкары ал мекенинде исламдын радикалдуу түрлөрүн жайылтуу боюнча үгүт жүргүзгөн. Орусиянын күч түзүмдөрү анын Якутияда экстремисттик идеологияны жайылтууга ниеттенгенин аныктаган.

"Суракта кыргыз жараны экстремисттик уюмга тиешеси бар экенин жана Якутияда кылмыш жасоого ниеттенгенин, бирок бул планын ишке ашыра албаганын билдирди. Прокуратура анын өкүнгөнүн жана исламдын экстремисттик түрүн катачылык менен кабыл алганын туура түшүнүп, ага эскертүү берип коё берди. Эгер кыргыз жараны мындан кийин укукка каршы аракетин жасаса, кылмыш жоопкерчилигине тартылмакчы",- деп жазышты басылмалар.

Айта кетсек, аталган экстремисттик уюм дүйнөнү басып алуу аркылуу "Бүткүл дүйнөлүк халифат" мусулман мамлекетин түзүү максатын көздөйт.