Сейил бакта кызды зордуктап, таш менен башка уруп, чөнтөгүнөн 20 сомду уурдаган жигит 25 жылга эркинен ажыратылды

Бишкектеги Ататүрк атындагы сейил багында кызды күч колдонуу менен зордуктаган жаран 25 жылга эркинен ажыратылды. Бул тууралуу бүгүн, 18-сентябрда Жогорку Соттун басма сөз кызматы билдирди.

Маалыматка ылайык, 2015-жылдын 28-майында саат 14:30 чамасында жигит аталган сейил багында К.К. аттуу кыз менен жолугушуп, аны адам жок жерге алып келип, күч колдонуу менен зордуктаган. Андан соң кылмышын жашырыш үчүн, жабырлануучунун алсыз абалынан пайдаланып, таш менен башына эки жолу урган. Мындан кийин кызды өлүп калды деп ойлоп, анын чөнтөгүнөн "Нокиа" үлгүсүндөгү телефонун жана 20 сомун алып качып кеткен.

Бир нече убактан кийин жабырлануучу өзүнө келип, элди жардамга чакырган. Аны көрүп калгандар "Тез жардамды" чакырышкан. Медицина кызматкерлери кызды ооруканага жаткырышып, ачык баш сөөк жаракаты, мээнин чайкалышы жана башка диагноздорду коюшкан.

Бишкектин Октябрь райондук соту бүгүн, 18-сентябрда жабык соттук отурумда кылмышка шектүү 1995-жылы туулган Абдумуталиб Мамажановго салынган айып боюнча ишти карап, аны "адам өмүрүнө кол салуу", "зордуктоо" жана "каракчылык" беренелери боюнча күнөөлүү деп тапты. Бул соттук чечимге ылайык, кылмышкер мүлкүн конфискациялоо менен 25 жыл мөөнөткө эркинен ажыратылат.