Араванда 15 жаштагы өспүрүм анын тамеки чеккенин ата-энесине айтам деген 5 жашар баланы кантип өлтүргөнүн айтып берди

Маалыматка ылайык, А.Анаров айылынын аймагындагы жүгөрү талааларынын биринен, жолдон 100 метрдей аралыктан колу-буту жана оозу скотчтолгон абалда Баходирхондун жансыз денеси табылган. "Бул кылмышка шектүү катары 2015-жылы 9-классты аяктаган (ошол бойдон окууну таштаган), маркумдун айылдашы, 15 жаштагы Р.И. аттуу бала кармалды. Кылмышка шектүү өспүрүм атасынын катышуусу менен болгон сурак учурунда жасаган кылмышын моюнуна алды. Анын айтуусунда, 2015-жылдын 22-сентябрында саат 18:00 чамасында Баходирхон анын тамеки чегип турганын көрүп, тамеки чеккендигин ата-энесине бирдирерин айтып коркуткан. Аны коркутуп коюу максатында үйүнө кирип скотч алып чыгып, Баходирхонду эгин талаасына алып барып, жерге жыгып, колу-бутун скотч менен байлап жатканда жаш бала кыйкыра баштаган. Анын кыйкырыгын эл угуп калбасын деп оозун, моюнун дагы скотчтоп, эгин талаага катарлаш жүгөрү талаасына таштап, өзү кетип калган",- деп билдиришти мекемеден.

Учурда кылмышка шектүүгө карата "алсыз абалынан же жашына жете электигинен пайдаланып адамды өлтүрүү" беренеси боюнча кылмыш иши козголуп, ал Араван РИИБинин убактылуу кармоочу жайына киргизилди. Бул кылмыштын бетин Ош ОИИБинин тергөө бөлүмүнүн жана Араван РИИБинин кызматкерлери биргеликте ачышты.