Жылнаама, 27-сентябрь: Мындан 82 жыл мурун дүйнөдөгү "эң жаш эне" атка конгон Лина Медина туулган

* Мындан 82 жыл мурун, 1933-жылы дүйнөдөгү "эң жаш эне" атка конгон Лина Медина Перуда туулган. Ал 5 жаш 7 айында эле эне болууга жетишкен. Азыркы учурда ал медицинанын тарыхындагы эң жаш эне болуп эсептелинет. 

Линанын ата-энеси анын ичи чоңоюп кеткенинен улам доктурга кайрылышкан. Доктурлар алгач шишик бар деп ойлошсо, аздан соң Линанын жети айлык боюнда бар экени билинген. Ушундан бир жарым ай убакыт өткөн соң, 1939-жылдын 14-майында Лина эркек балалуу болгон. Линанын жамбаш сөөгү жакшы өөрчүбөгөнүнө байланыштуу ал эң мыкты адистердин катышуусу астында операция жолу аркылуу көз жарган. 2,7 кг салмакта төрөлгөн наристеге Херардо деген ысым ыйгарышкан. Херардо Линаны өз эжесиндей көрүп чоңойгон, он жашка чыкканда гана ал өзүнүн энеси экенин билген. Ден соолугу чың болуп чоңойгону менен, тилекке каршы, 1979-жылы кырк жаш курагында сөөк оорусунан каза болгон. Кийинчерээк Медина Раул Жерадо аттуу жигитке турмушка чыгып, андан 1972-жылы экинчи эркек баласын төрөгөн.

* Мындан 20 жыл мурун, 1995-жылы дүйнө жүзүндөгү эң узун бойлуу кыз Элисани Сильва Бразилияда төрөлгөн. Анын бою 206 сантиметрди түзгөн. Адистердин айтымында, анын бою жыл сайын өсүп турган. Мектепке барыш үчүн автобуска батпай калган. Бул сыяктуу кордуктарга чыдабай мектепти таштап койгон Элисани Сильва модель болууну самаган.

* Мындан 12 жыл мурун, 2003-жылы тоолуу Алтайда күчү 7,3 баллга жеткен зилзала болгон. Мунун кесепетинен көптөгөн көчкүлөр түшүп, жерде жаракалар пайда болгон. 2 миңге жакын турак үй, 25 мектеп, 16 оорукана бузулуп, Бельтир айылы толугу менен кыйраган.

27-сентябрда кыргыз өлкөсүндө жана дүйнөдө орун алган окуялар тууралуу кененирээк бул жактан окуй аласыздар.