Ош. Мектеп директорлору окуучулар үчүн милиция бөлүмүнө, абактарга саякат уюштурууну сунуш кылышты

Бүгүн, 25-сентябрда Ош шаарындагы мектептердин директорлору жана директорлордун тарбия берүү иштери боюнча орун басарлары "Окуучулар арасында тартип бузууларды болтурбоо жана анын алдын алуу” темасы боюнча талкуу жүргүзүштү. Бул тууралуу Ош шаардык билим берүү башкармалыгынан кабарлашты.

Маалыматка ылайык, чогулуш эркин өтүп, мектеп жетекчилери "Канткенде терс нерселердин алдын алып, тартип бузууларды токтото алабыз?" деген сунуштары менен бирге өз ойлорун ортого салышты. “Биз окуучулар үчүн милиция бөлүмүнө, ден соолугунун мүмкүнчүлүгү чектелген балдардын жатак-үйүнө, керек болсо абактарга саякат уюштуруп, телепрограммаларды, радиоуктурууларды угузуп, балдардын уруш-талашынын алдын алсак болот”,- деген сунуштарын айтышты мектеп директорлору.

Жыйналышка катышкан бардык мектеп директорлору менен бирге тарбия иштери боюнча жетекчилер, Ош шаардык билим берүү башкармалыгынын тиешелүү өкүлдөрү жана милициянын өкүлдөрү өз ой-пикирлерин айтууга үлгүрүштү.